ಅಡ್ಡಪಟ್ಟಿಯ ಚಿತ್ರ

ವಿಳಾಸ ಇದ್ದೂ ಇಲ್ಲದ ಮನೆಯ
ಹಿಂಬಾಗಿಲ ಅಡ್ಡಪಟ್ಟಿಗೆ ಕೈ
ಹಚ್ಚಿ ನಿಂತದ್ದು ಕೇವಲ ಚಿತ್ರವಷ್ಟೇ

ಅಲ್ಲ ಎದುರಿನ ಕೆಪ್ಪು ಜೋಗವೂ
ಅಬ್ಬಿ ಬೀಳುವ ಹನಿ ನೀರೂ
ಚೂರಾಗಿ ಪಾರಾಗಿ ಹಸಿರೆಲೆಯ ಮೇಲೆ
ಕುಳಿತು ಹೊಳೆಯುವ ಮುತ್ತೂ
ಮತ್ತು ಒಂಟಿ ಉಳಿದ ಮುತ್ತುಗವೂ

ಒಂದೆಲೆಯ ಹಿಂಬಾಲಿಸಿ ಹೊರಟು
ಅಡ್ಡಬಿದ್ದೊಂದೆಳೆಗೆ ಉದ್ದುದ್ದ ಸಿಕ್ಕಿ
ತಪ್ಪಿಸಿಕೊಳ್ಳಲಾರದೆ ಬಳಲಿ ಬೆಂಡಾಗಿ ಬಿಕ್ಕಿ
ಅಂತೂ ಸರಾಗ ಹರಿದು ಸೇರಿದಲ್ಲಿ 

ತೀರದ ಶಬ್ಧ
ತೀರಿದ ಬದುಕು

ಅಲೆದಲೆದು ದಡ
ಸೇರುವ ಬದಲು ಅಲೆಯೊಳಗೆ ಇಳಿದರೆ
ಒಂದು ಮತ್ತೊಂದರ ನಡುವೆ
ಇನ್ನೊಂದು ಎನ್ನುತ್ತ ಭರತಕ್ಕೆ ಸರಿಯಾಗಿ
ದಡಕ್ಕೆ ಬಿದ್ದವರೆಲ್ಲ ಎದ್ದು
ಸಾಲಾಗಿ ಹೊರಟು ದೂರ ಸೇರಿಬಿಟ್ಟರು 

ಇರದ ಹೆಜ್ಜೆಯ ಗುರುತಿನ
ಊರೇ ಅಲ್ಲದ ಊರಲ್ಲಿ ತೀರ್ಥ
ಸೇವಿಸುತ್ತ ಪ್ರಸಾದ ಸ್ವೀಕರಿಸುತ್ತ
ಇಪ್ಪತ್ತೂ ಬೆರಳು ಸೇರಿಸಿ ಲೆಕ್ಕ
ಹಾಕುತ್ತ ನೀರಿರದ ನಳಕ್ಕೆ ಹೆದರುತ್ತ
ಮೆಟ್ಟಿ ನಿಂತ ನೆಲಕ್ಕೆ ಬೆದರುತ್ತ
ಉಬ್ಬಸದ ನಡುವೆಯೂ ಎದೆಯುಬ್ಬಿಸಿ ನಿಂತದ್ದು
ಚಿತ್ರವಷ್ಟೇ ಅಲ್ಲ; ದೃಶ್ಯಕಾವ್ಯ

ಕೋಳ ಕೆಳಗಿನ ಕೋಣೆ

ಕೋಳ ಸರೀ ಕೆಳಗಿನ ಕೋಣೆಯಲ್ಲಿ
ಈಗ ಯಾರೆಂದರೆ ಯಾರೂ ಇಲ್ಲ 
ಕವನವೊಂದರ ಹಳೇ ಪ್ರತಿಯ ಹೊರತಾಗಿ 

ಕೋಳುಕಂಬದ ತುದಿಯಿಂದ ಕತ್ತಲ ತೂರಿ
ಕೋಣೆ ಕಾಣಿಸುವ ಬೆಳಕಿನ ಕೊಳವೆ 
ಅದರೊಳಗೆ ಸೇರಿ ಹಾರುವ ಕಣ ಧೂಳು 
ಎಲ್ಲ ಅವಶೇಷಗಳ ನಡುವೆ ಹೂತುಹೋಗಿರಬಹುದು
ಬೆಂಡಾಗಿ ಬಿದ್ದ ಬಾಸಿಂಗದ ಕಡೇ ಚೂರು 
ಆ ದಪ್ಪ ಮಣ್ಣಿನ ಗೋಡೆಗಳ ಕೆಳಗೆ 
ಕೆಂಪು ಮಣ್ಣಿನ ವರೆದ ನೆಲದೊಳಗೆ 
ಅಡ್ಡಡ್ಡ ಮಲಗಿರುವ ಬಾಗಿಲಿಗೂ ಮರೆತಂತಿದೆ 
ತನ್ನ ಒಳಮೈಯ ಚಿಲಕದ ಜೊತೆಗೆ 
ಅವಿತಿರುವ ಕಳ್ಳ ಮೀಡದ ಸುಪ್ತ ಇರುವು 
ಆ ಕೋಣೆಗೆ ಹೋಗಲು ಸಮಾನಾಂತರ ಜೋಡಿಸಿಟ್ಟ 
ಮರದ ಏಣಿಯ ಹತ್ತೊಂಬತ್ತು ಮೆಟ್ಟಿಲುಗಳು 
ಅವಿತಿರುವ ಕಳ್ಳ ಮೀಡವನ್ನೇ ನೋಡುತ್ತಿರಬಹುದು
ಗೋಡೆಯೊಳಗೆ ತುಂಡಾದ ಜೋಡಿ ವೈರು 
ಮುರಿದ ಹಲ್ಲಿನ ಕಡುಗಪ್ಪು ಸ್ವಿಚ್ ಬೋರ್ಡು 
ಸುಟ್ಟ ಫಿಲಮೆಂಟಿನ ನಲವತ್ತು ವೋಲ್ಟಿನ ಬಲ್ಬು 
ರಜತ ಮಹೋತ್ಸವದ ತಯಾರಿ ನಡೆಸುತ್ತಿರಬಹುದು 

ಅಲ್ಲೊಂದು ತುಕ್ಕು ಹಿಡಿದ ಟ್ರಂಕೊಳಗೆ 
ಜಮಾಯಿಸಿದೆ ಆಟಿಕೆಗಳ ಸಮಸ್ತ ಕುಲ 
ಯಾರೂ ಬರದ ಕೋಣೆಯೊಳಗೆ 
ಪಕತ್ತು ನಾಟಕದ ತಾಲೀಮು ನಡೆಸುತ್ತಿವೆ. 
ಕಿಟಕಿಯ ಸಂದಿಯಿಂದ ಇಣುಕುತ್ತಿದೆ 
ಒಂದು ಹಸಿ ಮೆಣಸಿಗೆ ಖಾಯಂ ಬರುತ್ತಿದ್ದ ಗಿಳಿ 
ಮೈತುಂಬಿಕೊಂಡು ಬರುತ್ತಿದೆ ಒಳಗೆ 
ಪುಟವಿಟ್ಟ ಸಂಜೆಗೆಂಪಿನ ಸಾಲು ಸೊಗಸು  
ದೂರ ಸಂಜೆಗೆದುರಾಗಿ ಗರಿಬಿಚ್ಚಿ ಕುಣಿದ 
ನವಿಲಿನ ಮೈತುಂಬ ನಕ್ಷತ್ರಗಳ ಹೊಳಪು 

ಅದೆಷ್ಟು ಪರದೆ ಸರಿದಿರಬಹುದು ಅಲ್ಲಿ 
ಸೂತ್ರಧಾರ ಅಜ್ಜಿಯ ಎಷ್ಟು ವರ್ಷ ಸವೆದಿರಬಹುದು 
ನೆನಪುಗಳ ಹೊತ್ತಿಗೆಯಿಂದ ಆಕೆ ಹೊರತೆಗೆವ 
ಪುಟ್ಟ ಪಟ್ಟಿಯ ನೀಲಿ ನರಗಳಲ್ಲಿ 
ಮೊಮ್ಮಕ್ಕಳು-ಮರಿಮಕ್ಕಳೂ ಕವನವಾಗಿ ಹರಿದಿರಬಹುದು 
 
ದೂರ ತೀರದಲ್ಲಿದ್ದ (ನೆನಪಿಗೂ ಬಾರದ)  ಮನೆಮಂದಿಯೊಬ್ಬ
ಮದುವೆಯಾದದ್ದೇ ಕೊನೆ. 
ಅವನ ತಲೆಯ ಬಾಸಿಂಗ ತೆಗೆದು ಸಾವಧಾನ
ಅಖಂಡ ಮನೆಯ ಒಂದೊಂದೇ ಕೋಣೆಗಳ ಬಳಸಿ
ಕೋಳುಗಂಬದ ತಲೆಗೇರಿಸಿ ಕುಳಿತರೆ ರಾಜಭಂಗಿ
ಸರೀ ಕೆಳಗಿನ ಕೋಣೆ-ತುಂಬಾ ಗಲಗಲ ಸದ್ದು

ಒಬ್ಬೊಬ್ಬರಾಗಿ ಇಳಿದುಹೋದರು ನಿಧಾನ
ಆ ಮೆಟ್ಟಿಲುಗಳೀಗ ಅಲ್ಲಿಗೆ ತಲುಪಲಾರವು.
ಕೋಣೆಯೊಳಗೊಂದು ಸಂಪೂರ್ಣ ಭಿನ್ನ ಲೋಕ -
ಟ್ರಂಕೊಳಗಿನ ನಾಟಕದ ತಾಲೀಮು ನೋಡುತ್ತ
ಚಂಗ ಹಾರಿದೆ ಒಳಗೆ
ಸೊಂಡಿಲು ಕಳಚಿದ ಗಣಪನ ಖಾಸಾ ಇಲಿ
ಮಾಯವಾಗಿವೆ ಎಂಬತ್ತೇಳರ ಕ್ಯಾಲೆಂಡರಿನ ಅಂಕಿಗಳು
ದಿನ-ವಾರ-ತಿಂಗಳು-ವರ್ಷದ ಹಂಗು ತೊರೆದು
ಪಟದ ಲಕ್ಷ್ಮಿ ಕರಗಿ ಬಿಟ್ಟಿದ್ದಾಳೆ ಖಾಲಿ ಹಾಳೆ
ಇಂದು-ನಾಳೆಯ ಲೆಕ್ಕದ ಕೆಳಮನೆಯಿಂದ
ಕಣ್ಣು ಕಟ್ಟುತ್ತಿದೆ ಕೊಲವೆರಿ ಸಾಲುಗಳು ಪಕ್ತ.

ತನ್ನೊಳಗಿನ ಕವನಗಳ ತಾಕತ್ತು ನೆನೆದು
ಅಳಿದುಳಿದ ಸಂಕಲನದ ಸಾಲೊಂದು ರೂಪಾಂತರವಾಗಿ
ಗೋಡೆಗಳ ತುಂಬ ಅಕ್ಷರಶ: ತೆವಳಲಾರಂಭಿಸಿವೆ
ತಡೆದು ಹಿಡಿದಿದ್ದ ನಡು ಮುರಿದಂತಾಗಿ 
ಬಾಸಿಂಗ ಹೊತ್ತ ಕೋಳ ನೆತ್ತಿ ಬವಳಲಾರರಂಭಿಸಿವೆ.

ಜನವರಿಯಲ್ಲೇ ಬಂದು ಮನೆ ಅಳೆದುಹೋದವರು
ಅದೇ ಕೋಳ ಕೆಳಗಿದ್ದ ಮಂದಿಯೇ ತಿಳಿಯದಾಗಿದೆ

ಒಂದು ಸ್ವಪ್ನ

ಓ ಮಂಕಾಳೀ 

ಅಳಿದುಳಿದ ಕೇರಿಯ ಗಟ್ಟಿಗಿತ್ತಿ

ಘಾಟಿ ಹೆಂಗಸೆಂದರಲ್ಲವೇ ಎಲ್ಲ 

ನಿನ್ನ ಬೆನ್ನ ಹಿಂದೆ 

ಹೂತು ಹೋದ ಹಿಡಿ 

ಮೀಸೆ ಹೊತ್ತು ತಿರುಗುವ 

ಕೇರಿಯ ಮಹಾ ಮಾನವಂತರು 

ಅವರೆಲ್ಲರಿಗಿಂತ 

ಬಹಳ ಕಿರಿಯ ನಾನು 

ದೂರ ನಿಂತು ನೋಡಿಕೊಂಡೆ ಎಲ್ಲ 

ಸುಮ್ಮನೆ 

ನಿನ್ನ ಮಡಿಲಲ್ಲಿ ಕೂತು 

ಸೆರಗಿಂದ ಒಂದೊಂದಾಗಿ ತೆಗೆದು 

ತಿಂದ ಹಸಿ 

ಗೇರು ಬೀಜದ ರುಚಿ 

ಮರೆಯಲಾಗದಂತೆ ಹತ್ತಿಸಿಕೊಂಡೆ    

ತಿನ್ನುತ್ತ ಕದ್ದ ಮಾಲನ್ನು 

ಜೀರ್ಣಿಸಿಕೊಂಡೆ ಅರೆ 

ಪಾವು ಪಾಪ ಪ್ರಜ್ನೆಯನ್ನೂ 

ನಿನ್ನ ತುಟಿಯಂಚಿನ 

ಅಂಬಾಡಿ ಕುಡಿ ಕರಗಿ  

ಕೆಂಪು-ಕೆಂಪಾಗಿ ಗಲ್ಲಕ್ಕೆಲ್ಲ ಹರಡಿ 

ರಂಗೇರುವಾಗ 

ಮೆಲುಕು ಹಾಕುತ್ತಿದ್ದೆಯಲ್ಲ ನೀ -

ಅವರಿವರ ಮನೆ 

ನಿನ್ನ ಮನೆಯೆನ್ನದೆ ಸಾರ್ವತ್ರಿಕವಾಗಿ 

ಮಂತ್ರಾಕ್ಷತೆ ಪಡೆದವರ ಪ್ರವರ 

ಒಂದೊಂದು ಮನೆಯೊಳಗೂ 

ನೀ ಎತ್ತಿದ ಹಾನದ ವಿವರ 

ಇಡೀ ಕೇರಿಯೇ 

ನಡು ಮುರಿದಂತೆ ಅಶ್ವತ್ಥ ಕಟ್ಟೆಯೆದುರು 

ಒಂದು ಪೊಕಳೆಯನ್ನೂ ಹೊಡೆಯದೆ 

ಕೈಕಟ್ಟಿ ಕುಳಿತಾಗ 

ಬಿರಬಿರನೆ ಕೈ ಬೀಸಿ ನೀ 

ನಡೆದು ಹೋದ ಆ ಥರ 

ಒಬ್ಬೊಬ್ಬರಾಗಿ 

ಕೇರಿ ಬಿಟ್ಟು ಹೊರಟರಲ್ಲ 

ಸಾಲು ಕೇರಿಯ ನಡು ಮಧ್ಯ 

ಬೀಗ ಜಡಿದು 

ಕೇರಿಯುದ್ದ ನೀ ಕುಣಿಯುತ್ತ ಹೋದಂತೆ 

ಬಿದ್ದ ಮುಗಿಯದ ಸ್ವಪ್ನ 

ಓ ಮಂಕಾಳೀ

ನೋಡಿಲ್ಲಿ ಉಳಿದವರೂ ಬಿಡುತ್ತಿದ್ದಾರೆ 

ಯಾರ ಕಣ್ಣಂಚೂ ಕಾಣಿಸದಂತೆ 

ಕಪ್ಪು ಕನ್ನಡಕ ತೊಡಿಸಿ 

ತಂತಮ್ಮ ತಾಯ್ತಂದೆಯರ ಹತ್ತಿಸಿಕೊಂಡು 

ದಾರಿಯುದ್ದಕ್ಕೂ ಪರ ಊರ 

ಪರಿಮಳ ಹರಡಿ ಹೊರಟಿದ್ದಾರೆ 

ಖಾಲಿ ಕೇರಿಯ ಹಿಂದಿನ  

ಜಿಗ್ಗು ಬಿದ್ದ ಗೇರುಮರದ ತುಂಬ 

ಅತಂತ್ರ ಪರಿಮಳ ಸುತ್ತುತ್ತಿದೆ 

ನೀ ಕೊಟ್ಟ ಹಸಿ ಗೇರು 

ರುಚಿ ಕಳೆದು ಬೀಳುತ್ತಿದೆ 

ಬಾ ಬೇಗ 

ತೊಟ್ಟು ಕಳಚಿ ಬೀಳುವ ಮುನ್ನ 

ಒಂದು ತಂಬಿಗೆ ನೀರಿತ್ತು 

ಎಲ್ಲ ರುಚಿಯನ್ನೂ 

ನಿನ್ನ ಮಡಿಲಲ್ಲಿ ತುಂಬಿಕೊ 

ಕೇರಿ ಬಿಟ್ಟು ಹೊರಟವರಿಗೆಲ್ಲ 

ಅವರವರ ಮನೆ ಕಾಣಿಸು 

ಹಸಿದ ಮರಿ-ಮಕ್ಕಳಿಗೆಲ್ಲ 

ಹಸಿ ಗೇರಿನ ರುಚಿ ತೋರಿಸು  

ಮಣ್ಣಿನಲ್ಲಿ ಬಿದ್ದ ಹನಿ

ಒಂಟಿ ಮನೆಯ ಬಾಗಿಲಲ್ಲಿ ಚೆಂದ ನಗೆಯ ನೀರೆ
ಮುರುಕು ಹಿತ್ತಲ ಸಂದಿಯಲ್ಲಿ ಹಚ್ಚ ಹಸಿರು ಸೀರೆ

ಗಿರಗಿರ ತಿರುಗುವ ಗಾಳಿಯಲ್ಲಿ ನೋಡು ನಿನ್ನ ಅಂದ
ತೇವಗೊಂಡ ಮನಸಿನಲ್ಲಿ ತೂರಿಕೊಂಡ ಗಂಧ

ದಾರಿಗುಂಟ ಹಬ್ಬಿನಿಂತ ಬಣ್ಣದ ಹೂ ಬಾಲೆ
ದೊಡ್ಡ ಮರದ ನೆತ್ತಿಗೇರಿ ಪರಿಮಳದ ಮಾಲೆ

ಒತ್ತಗಟ್ಟಿ ನಿಂತರಲ್ಲಿ ಕಾಣಿಸದು ದಾರಿ
ತುರ್ತಿನಲ್ಲಿ ಹಚ್ಚಿ ನೋಡು ಒಂದು ಕಡ್ಡಿ ಗೀರಿ

ದಾರಿಯುದ್ದ ಬೀರಿಬಿದ್ದ ಬಿಟ್ಟ ಕಣ್ಣ ರಾಶಿ
ಹೆಕ್ಕುತ್ತ ಬಂದರೆ ಹಿತ್ತಲಲ್ಲೇ ಕಾಶಿ

ಕಾದಿದೆ ನೋಡು ನಿನಗೆ ಆ ಹಳೆಯ ಓಣಿ
ಎಳೆ ಎಳೆ ನೆನಪಿನಲ್ಲಿ ಮಾಡಿಬಿಡು ದೋಣಿ

ಮಣ್ಣಿನಲ್ಲಿ ಬಿದ್ದ ಹನಿಗೆ ಜಗದ ತುಂಬ ತಂಪು
ಹೊಳೆವ ರಾತ್ರಿ ತುಂಬಿ ಹರಿವ ನೀರು ಕಂಪು ಕಂಪು..

ಅನಿಸಿದ್ದಿರಬಹುದು ..

ಈ ಲಜ್ಜೆಯ

ಮೂಗೊತಿಯ ಒಜ್ಜೆ
ತಡೆಯಲಾರೆ ನಾ
ಬಿಚ್ಚಿಡುವೆ
ಕಾರಿರುಳ ಕಾಡಿಗೆಯ
ಕತ್ತಲ ಕಳೆಯಲಾರೆ
ಅಳಿಸಿರುವೆ
ತುಟಿಯ ಶೃಂಗರಿಸಿದ
ಕೆಂಪಿಗಿಲ್ಲವೇ ಹೃದಯ?
ತೊಳೆದಿಡುವೆ
ಹಣೆಯ ಕುಂಕುಮ
ಬೀಗಿ ಬಿಂಕದಿಂದ 
ಒರೆಸಿಡುವೆ

ಬಿಚ್ಚಿ ಮಣಭಾರದ
ಈ ಜರತಾರಿ ಸೀರೆ
ಹೊರಡುವೆ

ಈ
ಜನಪದವ ಬಿಟ್ಟು
ಜನರಿರದ ಊರಿಗೆ

ತ್ರಿಶಂಕು ಸ್ವರ್ಗ

ಒಂದು ಸರಿ ಮನೆಯೇ ಇಲ್ಲ ಅನ್ನುತ್ತ
ಲೇ ಅಲ್ಲಿಂದ ಹೊರ ಹೊರಟರೂ 
ಇಲ್ಲಿನ್ನೂ ಸರಿಯಾಗಿ ಒಳಗೆ ಬಿಟ್ಟುಕೊಂಡಿಲ್ಲದ
ಅನುಮಾನದಲ್ಲೇ ಸಹನೆಯ ಕಟ್ಟೆ ಒಡೆದು ಹೊರಟಿದ್ದಾಳೆ

ಬಿರುಕು ಬಿಟ್ಟ ತಾರಸಿಯ ಮೈಮೇಲೆ
ಹೊರಡುವ ಮೊದಲೇ ಮಾಡಿಟ್ಟ ಚಿತ್ರಕಲೆ.
ಪಾಚಿ ಕಟ್ಟಿದ ಹಕ್ಕೆಯ ಊರೊಳಗೆ 
ಮಳೆ ಒಳಗೆ ಮನೆ ಹೊರಗೆ ಆದ ಸು
ಸಂದರ್ಭದಲ್ಲೇ ಆಚಿಂದ ಈಚೆ ಈಚಿಂದ ಆಚೆ
ಹೊರಳಿದವಳೇ ಹೊಸಾ ಸ್ಟೇಟ್ಮೆಂಟು ಹೊರಡಿಸಿದ್ದಾಳೆ

ನಾಳೆಯೇ ಟ್ರಿನಿಟಿ ವೃತ್ತದ ನಡುವೆ
ಅವಳದೇ ಒಂದು ತ್ರಿಶಂಕು ಸ್ವರ್ಗಕ್ಕೆ ಶಂಕು
ಸ್ಥಾಪನೆ ಆಗಲಿದೆ ಮಾನ್ಯ ಮೂರು ಶ್ರೀಗಳಿಂದ
ಒಬ್ಬ ಶಂಕು ಇನ್ನೊಬ್ಬ ತ್ರಿಶಂಕು ಬಿಟ್ಟರೆ
ವಾಸ್ತುನಿಷ್ಟರ ಜೊತೆಯಾಗಿ ಅವಳೊಬ್ಬಳೆ ವಸ್ತುನಿಷ್ಟಳು

ತಾಪಿಯ ತುದಿ ಹತ್ತಿದ ಹಸಿರ ಕೆರಸುತ್ತ
ಮುರುಕು ಸಂದಿಯಲ್ಲೆಲ್ಲ ಬಿಕ್ಕಿನ ಗಿಲಾಯಿ
ಬಡಿಯುತ್ತ  ವಟ್ಟೆ ಮುಚ್ಚಿದ್ದಾರೆ ಅಲ್ಲಿ
ತಪಕ್ಕನೆ ಆದ ಗಾಯಕ್ಕೆ ಮುಲಾಮು ಹಚ್ಚುತ್ತ
ಮನೆಯ ಮೈಯೆಲ್ಲ ಮಳ್ಳು ಕಳ್ಳಿಯ ಹೊಡೆದು
ದುರ್ಬೀನು ಹಿಡಿದು ನೋಡುತ್ತಿದ್ದಾರೆ

ಇಲ್ಲಿವಳು ಟ್ರಿನಿಟಿ ವೃತ್ತದ ತುದಿಯಲ್ಲಿ  ಕುಳಿತು
ಹಾಸಿಕೊಂಡಲ್ಲೇ ಲೆಕ್ಕ ಹಾಕಿದ್ದಾಳೆ
ಇನ್ನೆಷ್ಟು ಎತ್ತರಕ್ಕೆ ಕನಸ ಏರಿಸಿಕೊಂಡರೆ
ತ್ರಿಶಂಕು ಸ್ವರ್ಗಕ್ಕೆ ಸೀದಾ ಪ್ರವೇಶ ಪಡೆಯಬಹುದೆಂದು...

ಹಾರಲಾರದ ಕನಸು

ಗೂಡಿನಲ್ಲಿ ಬಚ್ಚಿಟ್ಟ ಕನಸಿಗೆ ರೆಕ್ಕೆಗಳು ಬಂದರೆ

ಏನಾಗುತ್ತೆ ಮಹಾ ಹಾರುವುದನ್ನ ಕಲಿತಿಯಾವು
ಹಾರಿಯೂ ಹೋದಾವು.
ದೀಪ ಹಚ್ಚುವ ವೇಳೆಗೆ ಬಂದುಬಿಡಿ ಎಂದರೆ ಬಂದಾವೆ?
ಎದೆಯ ಗೂಡೊಳಗೆ ಬಚ್ಚಿಟ್ಟು ಬೆಚ್ಚಗಿಟ್ಟಷ್ಟು ಹೊತ್ತು ಅವು ನನ್ನವು
ಬಲಿತ ರೆಕ್ಕೆಯ ಜೊತೆಗೆ ನಂಟಿನ ಅಂಟೂ ಕಳಚಿ
ಹಂಗು ಹರಿದು ಹಗುರಾಗಿ
ಒಂದಿದ್ದದ್ದು ಎರಡಾಗಿ ಮೂರಾಗಿ ಆರಾಗಿ ಮೂಲ ಮರೆಯಾಗಿ, ಮಾಯೆಯಾಗಿ
ಛೇ ಬಿಡಿ, ಅವು ಹಾರುವುದಕ್ಕೆಂದೇ ಕಂಡ ಕನಸುಗಳು
ಗೂಡೊಳಗೆ ಇದ್ದಿದ್ದರೆ ಅನರ್ಥವಾಗುತ್ತಿತ್ತು
ಇರಬೇಕಪ್ಪ ಇನ್ನೊಂದಿಷ್ಟು ಕನಸುಗಳು
ಅವಿತಿಟ್ಟು ಮೌನಕ್ಕೆ ಕಾವಾಗಿ ಎದೆಯ ಗೂಡೊಳಗೇ ಬಿರಿದು
ಅರಳಿ, ಕಣ್ಣೊಳಗೆ ಕಂಪ ಸೂಸಿ ನನ್ನೊಂದಿಗೇ ಇರುವ ಹಾರಲಾರದ ಕನಸುಗಳು!

--- ಪ್ರಜ್ಞಾ ಶಾಸ್ತ್ರಿ