ತೀರದ ಮೋಹ

ನಿನ್ನದೇ ಬಿಂಬ ನೋಡು
ನಾಚಿ ಜಾರುವ ಹನಿಯೊಳಗೆ
ತಿಳಿ ಬಾಳೆಯ ಕೊಳದೊಳಗೆ
ಬೆಳಕಿನೆಳೆ
ಹರಿವಾಗ
ಮೈಚಾಚಿ ಕುಳಿತು ಗೋಡೆಗೆ
ಬಿಂಬ ಹಚ್ಚಿಟ್ಟು
ಮುನ್ನುಡಿಯಿರದ ಪುಸ್ತಕ ಓದುತ್ತ
ನೀ ಉಳಿದ
ಕನ್ನಡಿಯೂ ಇರದ ಮನೆಯೊಳಗೆ

ಮುಗಿಸಿದ್ದೇ
ಪುಟದಿಂದ ಪುಟಕ್ಕೆ
ಕೊನೆಯ ಮಡತೆ ಕಿವಿ ಬಿಚ್ಚಿ
ಹಾರಿದ್ದೆ ತಡ 
ನೀಲಿಯಾದೆ ನೀನು

ನೋಡುತ್ತ 
ಹಸಿ ನೆಲದೊಳಗಿಂದ ಎದ್ದು
ನೀರ ಸೆಲೆ
ಹಾವಸೆಯ ಹಸಿರೊಳಗೆ ಹರಿದು
ತನಗೇ ತಿಳಿಯದಂತೆ
ಕೆಂಪು ಹರಿವಲ್ಲಿ ಸೇರಿಹೋಗುತ್ತದೆ 
ಬೊಗಸೆ ಹಿಡಿದರೆ 
ಸ್ವಚ್ಚ ಸೇರು ನೀರು
ಗಟಗಟನೆ ಕುಡಿದು ಬೀಳ್ಕೊಂಡರೆ
ಮಣ್ಣ ವಾಸನೆಯೂ
ತಪ್ಪಿಸದೇ ಬೆನ್ನು ಹಿಡಿಯುತ್ತದೆ

ಹಿಡಿದಷ್ಟು ಬೊಗಸೆ
ಕುಡಿವಷ್ಟು ನೀರು
ಇದೆಂಥ ಮುಗಿಯದ ದಾಹ?

ತಿರುಗಿ ಗಾಜಿನೊಳಗೆ
ಒಂದು ಮೀನು
ಒಂದೇ ಉಸಿರಿಗೆ ಹುಡುಕುತ್ತಿರುವಾಗ
ನಿನ್ನೆ ಹುಟ್ಟಿದ
ಕರುವಿನ ಕತ್ತಿಗೆ ಕಣ್ಣಿ
ಬಿಗಿದುಕೊಂಡು
ಕಣ್ಣ ತುಂಬಾ ನೋವು ಹೊರಡುವಾಗ
ಹಾಯ್...
ಮೂರು ಸಲ ಕೂಗಿದರೂ
ಕಾಣಿಸದ ಕಾಗೆಗೆ ಹುಡುಕಿ ಉಣ್ಣುವಾಗ..

ಮತ್ತೀಗ
ಕಣ್ಣೊಳಗೆ ಹಸಿರು ತುಂಬಿಸಿ
ಬಿಂದಿಗೆ ತುಂಬ ಬಿಂಬ
ಹಿಡಿದು ದಾಹ ತೀರಿಸಿಕೊಳ್ಳಬೇಕು
ತೀರದ ಮೋಹ ಅರಸಬೇಕು